Due ragazzi seduti in autobus controllano insieme uno smartphone. Sulla sinistra un altro ragazzo in piedi che gli volta le spalle.

Tosc n abo+ da d’instà per studënc y studëntes?

L Cunsëi provinziel à apurvà na pruposta

14 de utober 2020

Per zitadins y zitadines tl Südtirol che studiea te na università oradecà dëssel unì pità n Südtirol Pass abo+ limità y a n priesc arbassà. L Cunsëi provinziel à apurvà na pruposta n chësc cont.

Plu de 9.000 jëuni y jëunes de nosta provinzia studiea te na università oradecà. Per chëi che ie mé a cësa tl Südtirol ti mënsc da d’instà dëssel unì pità aldò dla pruposta dla cunseliera dla SVP Jasmin Ladurner n abunamënt da d’instà a n priesc arbassà. Chësc pudëssa per ejëmpl valëi da juni a utober. L vën oradechël nce pensà a tëmps plu flessibli dl abo+ anuel per studënc y studëntes, chël uel dì cun n tëmp che vel respetivamënter 12 mënsc da canche l ie unì fat dumanda. La nuviteies ti unissa bendebò ancontra a truep jëuni y truepa jëunes, nsci Ladurner, y oradechël fosseles na mutivazion n plu per se nuzé di mesuns publics.

L Südtirol Pass abo+ per studënc y studëntes ie tl mumënt mé da avëi coche abunamënt anuel al priesc pauscial de 150 euro cun validità respetivamënter da setëmber nchin de setëmber dl ann do. Ntëur n 8.000 studënc y studëntes y lerneri y lerneres se nuza de chësta ufierta. Leprò iel mo n 72.000 sculeies dla scola elementera, mesana y auta che se nuza dl abo+ y che paia na soma anuela de 20 euro. Nsci iel de ndut n 80.000 mutons y mutans y jëuni y jëunes che à n Südtirol Pass abo+.

La puscibilteies tecniches y aministratives per la realisazion de chësta pruposta vën śën valutedes tl Departimënt Mubiltà dla Provinzia. La nuviteies pudëssa l plu abenëura unì pitedes n auter ann.