Fermata autobus a Bolzano

Architades dl bus: vare por vare indô atives les tofles cun indicaziuns digitales

Sëgn cun n software nü y en pert cun dac te tëmps reai

Do da de gragn laurs de manutenziun vá sëgn vare por vare indô en funziun les tofles digitales pro les architades di bus. I indicadus a LED pro les architades é ti ultims mëisc gnüs atualisá cun n software nü a na moda che les feter 260 tofles d'indicaziun despones sëgn de dac te tëmps reai, tan inant che chisc vëgn trasmetüs dai veicui.

Mo co fejon pa da reconësce sce pro l'ora de gnüda che é da odëi sön la tofla se tratera de n tëmp real?

Sön les pices tofles d'indicaziun dl orar él n punt slominënt che segnalëia le tëmp real. Che che ó tó le bus vëiga te tan de menüc - cun lapró ince eventualmënter l’intardiamënt - che le bus de chë linia vëgn. Sce al n'é indere degun punt slominënt dlungia i menüc che vëgn indicá, se tratera dl orar aladô dl plan. Chël ó dí che por chësta linia n'él nia a desposiziun dac te n tëmp real.

Sön les gran tofles d'indicaziunda de plü risses reconëscion le tëmp real, dal fat che al vëgn cumpedé derevers i menüc cina ala rovada dl bus. Sce pro na linia dl bus vëigon, cina che al pëia ia, ma l'orar (p.ej. 12:50), dailó se tratera de na rovada programada aladô dl plan mo nia de n tëmp real.

Bun da savëi: Por che al vëgnes mostré sö i dac te n tëmp real pro les architades, mëss ince vigni bus avëi la tecnologia che vá debojëgn y ester colié cun le sistem de dac zentral. Chësc n'é nia ciamó le caje pro düc i sorvisc de bus. Do che al sará gnü surandé danü i sorvisc di bus fora dles cités y do che al sará gnü introdüt le sistem ITCS nü gnarál le proscim ann fat döt por mëte te n tëmp cört indlunch a desposiziun i dac te n tëmp real por dötes les linies di bus.

Giapé nutizies-push

Giapa nfurmazions sun ti fermedes y linies. Chësta mpustazion possa unì deativeda te uni mumënt tres l browser.