Ince en chësc ann ciafa les pendolares y i pendolars che s'anüza dl Südtirol Pass o dl Euregio Family Pass na picia indenisaziun finanziara sce na ferata röia massa tert o toma fora: le bonus por pendolares y pendolars por l'ann 2020 vëgn acredité ai 14 de forá dl 2022.
Aspeté la ferata é datrai por nia, mo almanco nia daldöt debann: canche al toma fora sovënz na ferata o canche ara röia massa tert mëss les dites dla ferata paié straufunghes contratuales che vëgn spo dades inant dal Departimënt Mobilité dla Provinzia ales pendolares y ai pendolars atocá.
Les porsones che vá regolarmënter cun la ferata dles dites dla ferata locales Trenitalia y SAD á le dërt da ciafé n bonus de alplü 50 euro al ann. Le bonus ti vëgn paié fora ales porsones interessades por chi mëisc olache al é gnü adoré almanco 30 iadi le Südtirol Pass o l'EuregioFamilyPass.
Aladô de chësc ciafa en chësc ann 5.938 porsones le bonus por pendolares y pendolars por l'ann 2020 y indöt vëgnel paié fora 130.000 euro. Düc i dac che ó ester por calcolé le bonus án avisa danman y insciö vára da fá fora avisa por vigni porsona singola y por vigni mëis a tan che le bonus amunta.
Ales porsones cun le Südtirol Pass o l'Euregio Family Pass ti vëgnel acredité le bonus por pendolares y pendolars ai 14 de forá dl 2022. L'import vëgn metü pro le credit romagnënt sön chertes prepaid o trat jö dal proscimo cunt dl Südtirol-Pass che an ciafa da paié
Le bonus por pendolares y pendolars é pert dla cherta dla cualité
N'indenisaziun finanziara por les porsones che tol la ferata, tl caje che la ferata s'intardiëies plü iadi o tomes fora, vëgn preodüda tla cherta dla cualité danter les dites dla ferata y la Zentrala di consumadus. Le provedimënt se basëia sön le regolamënt (CE) n. 1371/2007 che reverda i dërc y i dovëis dles passajieres y di passajiers dla ferata y mira indiretamënter ince a garantí y mioré la cualité di sorvisc dla ferata por süa clientela.
I bonus vëgn en pert finanziá dales straufunges fates vigni mëis por intardiades o straicades dla ferata preodüdes ti contrac de sorvisc dla Provinzia cun Trenitalia y SAD. Al toca paié straufunghes contratuales canche la cuota porcentuala de intardiades al mëis vá sura la cuota stabilida por vigni linia dla ferata de plü co un n punt porcentual fora.Al vëgn araté "n’intardiada" canche l'orar dla ferata dé dant vëgn surpassé de plü de 5 menüc, ince sce al é da dí che les intardiades á de nen fá te tröc caji cun laurs de manutenziun, reparaziun y costruziun pro l'infrastrotöra dla ferata.