Che che ó daidé para ativamënter por ci che reverda les informaziuns di passajiers y dles passajieres pó sëgn tó pert tres la app "Telegram" al grup d'informaziun dla mobilité dl Südtirol (MobIS).
Che ne sá pa nia sciöche ara é: la ferata romagn te n iade chita amesa la trassa, ara ne röia nia a destinaziun o ne pëia gnanca ia. Degügn ne sá ciodí y naota él da aspeté. Te chisc caji funzionëia le flus d'informaziuns danter les porsones responsables dla ferata, les zentrales de comane y i passajiers y les passajieres datrai ma bel plan.
südtirolmubiltà ó trá ite i zitadins y les zitadines
Por ci che reverda l‘informaziun de che che s'anüza di mesi publics él gnü fat tröp ti ultimi dui agn. Cun l'ampliamënt dl zënter de sorvisc y informaziun, la plata web y la app nöies, i avisc-push y la rëi digitala éra jüda da mioré de cotan y fá gní plü asvelta la comunicaziun cun les porsones che tol i mesi publics. Y sëgn junse cun MobIS, l'informaziun sön la mobilité dl Südtirol, ciamó n vare inant ciaran da trá ite diretamënter i zitadins y les zitadines canche ara nen vá da lascé alsavëi le plü debota che ara vá de majeri intardiamënc, interuziuns o sce n meso de trasport toma fora, dantadöt tl trafich dla ferata.
Insciö vára:
Sce te rodes ince tö cotan cun i mesi de trasport publics, dantadöt cun ferates regionales, spo te inviunse da fá para a nosc grup-MobIS sön Telegram y da ti lascé alsavëi a chësta moda interuziuns eventuales sön tüa trassa al zënter de sorvisc y informaziun südtirolmubiltà.
Nüsc manager dl‘informaziun ciarará da abiné fora de plü informaziuns, laurará fora i avisc y injuntará en caje informaziuns. L'informaziun gnará spo publicada y atualisada daimproia a livel ampl sön i canai desvalis, sön la plata web, la app y i monitors d'informaziun.
Aste interes da fá para? Spo anunziëiete pro nosc zënter de sorvisc y informaziun tres e-mail contact@suedtirolmobil.info. Láscese prëibel alsavëi sön ci trasses y da ci ora che te podesses fá tües segnalaziuns sön la mobilité. I orun amplié le grup-MobIS da sëgn cun porsones che vëgn da dötes les perts dla provinzia y curí insciö diretamënter dötes les linies plü importantes.