En domënia é döta la linia dla ferata de Puster döt le de sarada, le toch Sanciana-Bornech romagn stlüt cina ai 4 de novëmber.
Porvia de de gragn laurs de costruziun y manutenziun sarál ti proscims dis de majeres interuziuns pro la ferata de Puster: En domënia, ai 30 d’otober romagn la linia dla ferata danter Franzensfeste y Sanciana döt le de sarada, le toch danter Sanciana y le confin de stat romagn stlüt dales 9 ales 12.
Alta Val de Puster: Toch stlüt cina ai 4 de novëmber
Le toch dla ferata Sanciana-Bornech romagn stlüt da en lönesc, ai 31 d’otober cina en vëndres, ai 4 de novëmber porvia de laurs por rové le punt dla ferata a Valdaora Dessura. Do le burt tëmp de novëmber dl 2019 ê la trassa dla ferata rovada sot na roa. Le toch danajé é indô gnü cuncé provisoriamënter. Sëgn vëgn chësc toch metü definitivamënter en segurëza cun n punt. Porvia di laurs de costruziun romagn le toch dla ferata danter Sanciana y Bornech plü dis saré. Por ne cherié nia massa problems él gnü chirí fora adöm cun le RFI l’edema olache al n’é nia scora.
Sorvisc de sostituziun dla ferata: I dis da laur vál vigni mesora n bus impede la ferata; la domënia y i dis de festa vál vigni ora n bus.
Prëibel metede averda:
- I bus che vá impede la ferata vá feter düc tles staziuns dla ferata cun val’ ezeziuns. Dötes les informaziuns é da ciafé sön la tabela di orars 400B / orar dl sorvisc de sostituziun dla ferata.
- En lönesc, en mercui, en jöbia y en vëndres tomel ince fora la ferata R 1885 che pëia ia da Franzensfeste dales 18:20 ince tl toch Franzensfeste-Bornech; al vá n bus impede la ferata.
- Do che i laurs de costruziun y manutenziun é gnüs stlüc jö pón jí porintant ma plü en tan debota sön de plü toc. An mëss porchël s’aspeté i dis dedô intardiades pro la ferta de Puster.
Ciamó d’atri laurs de ressanamënt
La STA – Strotöres dl trasport dl Südtirol SA - s’anüza dla stlüta dla ferata de de plü dis por fá en colaboraziun cun la RFI laurs de reparaziun y manutenziun de prescia te val’ staziuns dla ferata. Insciö vëgnel fat danü l’assosta dl marciapisc dla staziun a San Laurënz y Bornech Nord, a Bornech Nord vëgn le marciapisc dla staziun ince cuncé. Pro la staziun de Perca vëgnel ressané l’assosta dl punt da jí a pe che é gnü danajé l’ann passé d’agost dal burt tëmp.