Porsones zënza la variora che ne pó nia plü s'anuzé di mesi publics, d'atres che s'á amaré y ne pó nia plü rovëne n meso publich - le trasport local publich röia tres plü tla smorzia dla varianta Omicron.
Do da dui agn de pandemia fej sëgn la varianta nöia Omicron jí sö dër dassënn i numeri dles infeziuns a livel mondial. Cina sëgn éra jüda da gestí valgamia bun la mancianza de personal por gauja dl coronavirus tl trafich dl bus y dla ferata. Deache al é atualmënter dër tröc caji de maratia y de cuarantena y ince deache al vëgn metü sö la regola di 2G él dai 10 de jená inant da fá cunt cun loces tl trafich dl bus y dla ferata ciodí che al mancia personal. Y a zacotan de passajiers y passajieres ne ti gnarál tl dagní nia conzedü l'azes ai mesi de trasport publich.
Super Green Pass (2G) y FFP2
Dal scomenciamënt dl ann incá é les mosöres cuntra le Covid 19 gnüdes plü rigoroses a livel nazional: dai 10 de jená vel por les porsones sura i 12 agn che tol le bus o la ferata l'oblianza dl Super Green Pass. Chël ó dí che les porsones che ne s'á nia lascé fá la variora cuntra le Covid 19 o n'á nia albü l'infeziun ne pó nia plü tó i mesi publics. Al resta inant l'oblianza da se vistí na maschera FFP2 por dötes les porsones che s’anüza di mesi publics.
Regoles ezezionales cina ai 10 de forá por scolars y scolares
Por düc i scolars y dötes les scolares dles scores elementares, mesanes y altes dl Südtirol él gnü arjunt na regolamentaziun d'ezeziun cina ai 10 de forá: da jí y da gní da scora cun i mesi publics vel por intant ciamó la regolamentaziun di 3G. Do dai 10 de forá messará spo sostanzialmënter avëi dötes les porsones sura i 12 agn che tol i mesi publics le Super Green Pass.
Sorvisc dl bus y dla ferata: na gradiscima desfida d'organisaziun
Pro le trafich dl bus y dla ferata vëgnel atualmënter fat döt le poscibl por organisé y garantí le miú che ara i sorvisc tl trasport publich ince sce al vëgn dër gonot a mancé personal al ultimo momënt. Le personal y i ofizi competënc laora de y nöt por ciaré che dötes les linies importantes sides curides, dantadöt tratan i orars de trafich prinzipai, y ciara da sposté personal canche al toma fora zacai al ultimo momënt.
Informaziuns por che che s'anüza di mesi publics:i fajun döt le poscibl
Canche i chiris online i orars y ince tres avisc atuai sön nosta plata web y tres nosta app fajunse döt ci che ara vá por ves lascé alsavëi adora assá sön ci linies che al podess tomé fora val' sorvisc. Mo baldi n'él nia poscibl da lascé alsavëi adora assá vigni iade singul che toma fora y porchël periunse do osta comprenjiun.