La ferata impede l'auto: che che ó rodé tl raiun danter Balsan y Maran en lönesc de Pasca ne dess nia se lascia sciampé la gran oferta de coliamënc cun la ferata.
Da Pasca ne vëgnel nia ma metü a jí n gran numer de manifestaziuns te tröpes perts dla provinzia, mo al é sambëgn ince do la rata dagnora dër n gran trafich sön strada. Deache al é sön le program la partida dl FC Südtirol él da s'aspeté ciamó na majera afluënza de jënt y auti.
Anfat sce an é apascioná dl jüch al palé, sce an ó se fá na roda o n'escurjiun - en lönesc de Pasca él zënzater damí tó la ferata: i coliamënc dla ferata sön la linia danter Balsan y Maran vëgn ampliá aposta por i 10 de aurí. Danter les 9:01 y les 18:01 da Balsan y danter les 9:16 y les 18:16 da Maran ne vá les ferates nia ma vigni ora mo bëgn vigni mesora. Y valch é sigü: vigni porsona che tol la ferata porta pro a smendrí le trafich sön strada.
Ferates vigni mesora ince tl raiun sot Balsan
Ince sce an vëgn da süd é la ferata la miú alternativa. Cun l'ultimo mudamënt di orars de dezëmber él ince sön chësta trassa gnü aumenté dassënn i coliamënc dla ferata tratan le fin dl'edema domisdé, y insciö él a desposiziun les sabedes, les domënies y tratan i dis de festa - chël ó porchël dí ince en lönesc de Pasca - na ferata feter vigni mesora.