Che che vëgn en vacanza chiló da nos dess s’anuzé ciamó deplü di mesi dl trasport publich. La Junta provinziala á aprové n conzet nü por les chertes di ghesć y so model de finanziamënt.
Codes y strades suraciariades caraterisëia la vacanza tl Südtirol. La Provinzia de Balsan y les organisaziuns turistiches ó daidé. Dal 2023 inant dess le "Südtirol Guest Pass” che é bele gní metü sön na basa ampla nöia y gní pité tres les strotöres d’alberch te döt le raiun. Al é preodü n model da trëi liví por les chertes di sciori: Pro la prestaziun de basa alda l’adoranza de mesi dl trasport publich o ince l’entrada te rodunt 80 museums. Les organisaziuns turistiches pó pité ince dlungia les prestaziuns de basa prestaziuns regionales surapró. Ti proscimi agn dess l’oferta gní ampliata vare por vare.
I cosć por l’oferta combinada dla cherta vëgn curis cun la tassa de sojornanza comunala, che mëss gní scudida dales stotöres d’alberch por les sojornanzes.
Mobilité sostignibla: Ampliamënt di sorvisc y vijites mirades
Sön le tru devers de n "Südtirol Guest Pass” nü él ciamó tröp da fá, sotrissëia l’assessur provinzial por la mobilité Daniel Alfreider: dal svilup dla cherta da pert dl setur turistich tres la digitalisaziun cina a arjigné ite danü i mesi dl trasport publich. Mo i vantaji é tlers: "A chësta moda s’anüza de plü ghesć dles ofertes de mobilité sostignibla. I scioldi vëgn trac ite tres le sistem de scudida fat fora cun les strotöres a nöt. De chisc podunse s’anuzé por amplié i sorvisc de mobilité tl raiun rural y aumenté la frecuënza sön certes linies." Pornanche i sorvisc é digitalisá, podessel cinamai gni mené te n secundo vare flusc de vijitadus, á dit Alfreider.
Chertes di ghesć nöies vëgn laurades fora
Le sistem ampl dles chertes di gheć nü vëgn svilupé al momënt dal fornidú de sorvisc economich IDM Südtirol en colaboraziun cun i rapresentanc de interesc dles organisaziuns dl turism dl Südtirol. La Junta provinziala á fat fora ai 11 d’otober les prestaziuns dla Provinzia ti ciamps mobilité y museums por la cherta y les tarifes che alda lapró. Les chertes di ghesć che é bele pó gní tutes inant por n tëmp de passaje y chël cun les condiziuns che á valü cina sëgn; al vëgn apliché eventualmënter adatamënc al’inflaziun. I portadus dl "Südtirol Guest Pass" y dl sistem che alda lapro é n zënter de coordinaziun aposta, che vëgn organisé da dales organisaziuns dl turism. (USP)