150 menüc de ativité fisica al'edema ó dí aladô dl'organisaziun mondiala dla sanité WHO de regola na majera aspetanza de vita de 7,5 mëisc, feter 3,8 miliuns de caji demanco de maraties ala zircolaziun y al cör y n arbassamënt mesan dles spëises sanitares dl 0,6 %.
Porimpó ciafon sovënz n stlafun de vertores por ne fá nia ativité fisica. Al é na soluziun scëmpla al problem, an pó colié l'ativité fisica cun i trus da vigni de y colié l'ütl cun le devertimënt. Ajache che che vá a scora, a lauré , a na sentada dl'uniun o a n'incuntada cun compagns y compagnes, pó jí tl miú di caji n toch o döt le toch a pe o cun la roda
Sciöche chësc vá da fá y sciöche vigni porsona pó jí a pe o cun la roda canche al n'é nia da jí lunc , mostra la campagna de südtirolmobil “… y bun me fejel “, che é gnüda realisada en colaboraziun cun l'aziënda sanitara tl cheder dl proiet europeich LifeAlps y che i odun chisc dis sön les strades, i trus da jí a pe y les plazes dl Südtirol.
Imajes fora dla vita da vigni de
Tl cheder dla campagna südtirolmobil él da odëi n musicant che vá cun la roda cun süa tuba ala proa dla musiga, n stödafüch, che vá cun la roda tla hala di stödafüch dailó dlungia. Mo ince le dotur dl sport, les volontares dla Crusc blancia y dla Crusc cöcena y les döes ëres plü de tëmp renunziëia al auto sce al n'é nia da jí lunc y vá a pe o cun la roda.
Ëise ciamó domandes?
Chiló podëise lí sciöche le movimënt tla vita da vigni de ti fej bun a osta sanité.