Na cherta por döt - por döta la provinzia, por döt l'ann. Dan da avisa 10 agn ál metü man na era nöia tl trasport publich cun le Südtirol Pass.
"I piun ia cun le Südtirol Pass" gnôl dit ai 14 de forá dl 2012. Al é sté plülere comples da le lauré fora ti dui agn de preparaziun sot l'assessur provinzial da inlaota Thomas Widmann. L'obietif ê tler: na cherta sora por le bus y la ferata, n sistem tarifar nü che inviass da tó tröp i mesi publics, n check-in aslöm da senté ite, n paiamënt saurí, por nominé ma n valgönes cosses.
Naota êl gnü limité danü i raiuns tarifars, spo él gnü pormez le svilup dl sistem de obliteraziun contactless por les chertes de iade eletroniches, la cumpra,l'instalaziun y le coliamënt te döta la provinzia di aparac de obliteraziun nüs y ala fin l'elaboraziun de passa 60.000 domandes – en pert ciamó sön papier - por lauré fora y ortié la cherta puntualmënter.
Saurí da mudé da n meso al ater
Te cört tëmp s'á etablé le Südtirol Pass sciöche acompagnadú de tröpa jënt dl Südtirol. Le passé dal bus ala ferata ê t'en iade dër saurí, le numer di passajiers y dles passajieres smizâ sö te n iade. Ince les regiuns vijines spizorâ les orëdles: le conzet é gnü presenté ne sá ma nia tan de iadi te gremiums daite y defora dala Talia, dantadöt tl'Austria, y al é intratan bele ince gnü fat do cizé.
Döt le Sütirol te gofa
Feter le mez dla jënt dl Südtirol s'anüza de n Südtirol Pass tles variantes desvalies y vá impara te döt le Südtirol bun marcé y a na moda flessibla.„Döt le Südtirol te gofa“ é porchël ince le slogan sön les tasces de peza börnes che vëgn partides fora te chisc dis te val' staziuns dla ferata tl Südtirol por i 10 agn dl Südtirol Pass. Cun n'aziun de placac ojon le focus sön chësc aniversar.
Le Südtirol Pass se svilupëia inant
Le conzet che reverda le Südtirol Pass é ti ultims agn gnü tresfora svilupé: por ejëmpl cun la funziun de paiamënt por tó para la roda y i tiers, l'ajunta dla cherta de vantaje Euregio Family Pass o cun le Summer abo+. Cun la cherta Euregio Ticket Students él gnü fat n pröm vare devers de na mobilité publica che vá sura i confins fora. L'ann passé él rové pormez l'obliteratziun online, chësc ann án ajunté le mobile ticketing y al vëgn ince lauré fora n Südtirol Pass por n manajamënt dla mobilité sostignibl tles aziëndes.