Studentessa con il nuovo Summer abo+

Nività: Summer abo+ per studënc dl’università

Aunamënt sajonel per i mënsc da d’instà tl Südtirol

La doi nuviteies per i studënc y la studëntes dl’università: L abo+ “normal” arà na validità flessibla y l sarà tosc da garat l “Summer abo+”, l abo+ da d’instà.

A pië via dala metà de juni puderan se damandé o ativé l Summer abo+ nuef. Chësta puscibltà nueva  ie dantaldut penseda per i jëuni y la jëunes che sta dalonc da cësa y che uel furné ncantëur tl Südtirol a bon priesc cun la curiera y la ferata ntan i mënsc da d’instà.

A na tarifa fissa de 75 euro possen cun l Summer abo+ se nuzé zënza limitazions de duc i mesuns dl trasport publich südtirolmubiltà ntan i mënsc de juni, lugio, agiost y setëmber. L Summer abo+ ne ie perdrët nia na cherta de viac ma plutosc n pachet de njonta che possa unì ciarià sun l Südtirol Pass y unì adurvà a na maniera flessibla. Nce n abo+ bele esistënt che valova dant per dut l ann possa unì trasfurmà te chësc abunamënt sajonel sce l nuzënt /la nuzënta à i recuisic damandei: età sot ai 28 ani y iscrizion a na università, n istitut superieur de spezialisazion o a n istitut ecuivalënt.

L abo+ da d’instà ie unì apurvà dala Jonta provinziela sun pruposta dl assessëur per la mubiltà Daniel Alfreider tl cheder de n ajurnamënt dl sistem tarifer dl trasport publich local. La scumenciadiva nstëssa ie pieda via dala “Südtiroler HochschülerInnenschaft, sh.asus, y la cunseliera Jasmin Ladurner ova l ann passà prejentà na mozion n chësc cont.

Plu flessibltà per l Südtirol Pass abo+ per i studënc y la studëntes

Mo na nuvità reverda la validità dl abo+ "normal" per i studënc y la studëntes universiteres: la data de validità anuela ne toma nia plu ai 15 de setëmber de uni ann. Tl daunì puderà i studënc y la studëntes se damandé o renuvé l abo+ a na maniera flessibla ntan dut l ann y la cherta de viac valerà for per n ann ntier dala data d’emiscion o dal paiamënt dla chëuta anuela. Per i sculeies dla scoles elementeres, mesanes, autes y prufesciuneles, alincontra, resta la validità anuela dl abo+ fisseda ai 15 de setëmber.

Giapé nutizies-push

Giapa nfurmazions sun ti fermedes y linies. Chësta mpustazion possa unì deativeda te uni mumënt tres l browser.