I mesuns publics possa da moinlà unì ocupei per al plu l 80 percënt. L resta mpe la ublianza de tenì sëura la mascra che cuer nes y bocia. Chësc ie cie che la Jonta provinziela à prezisà n cont dla mesures sun la defendura contra l coronavirus.
Tla curieres y ferates dla mubiltà publica locala de nosta provinzia possel per ntant unì ocupà l 80 percënt dla lueges da senté y da sté mpe despunibles. Mé sce i ghesć ne sta nia plu che 15 menuc sun l mesun de trasport, sce l ie sun l mesun n mplant d’ariazion autorisà cun barat d’aria y filter y te situazions d’emergënza possel unì ocupà duc i posć a despusizion. L 80 percënt dla capazità lasceda pro vel nce per furnadoies y mplanc portamont cun cabines stlutes.
Chësta limitazions ne dassëssa sun la majera pert dla linies per ntant nia vester n gran problem: Pervia dl smartworking, dl homeoffice, dl nseniamënt n pert online y dla ntreda scialiereda te truepa scoles àn pudù cunstaté tla ultima enes feter n terzo de viagiadëures de manco sun la curieres y la ferates che no tl medemo tëmp dl ann passà, uel dì, dan la pandemia.
L resta mpe la ublianza per chi che furnea cun i mesuns de trasport de tenì sëura la mascra. Na ezezion vën mé fata per mutons y mutans che ne à mo nia arjont l’età de scola y per persones che possa prejenté na zertificazion che les ie delidedes dala ublianza de purté na mascra. Limitazions pervia dl’ emergënza sanitera iel per i servijes de linia di nightliner: L ultim viac possa unì fat al plu tert tl tëmp dla stlujura cumandeda per i locai publics, uel dì, nchin dala 23:00.
Te uni cajo, dij Daniel Alfreider, iel da mantenì la destanzes de segurëza y da schivé foles de jënt sibe sun i mesuns publics che ti raions da aspité. L assessëur provinziel ti cumët a duta la persones che ie de viac de se cumpurté a na maniera respunsabla: “Tenion ite duta la mesures de segurëza. Mé sce se respeton l un cun l auter pudons schivé de se taché l virus.”