Cun le mobile ticketing scomëncia südtirolmubiltà na era nöia: tröpes chertes pón sëgn ince cumpré y convalidé online.
Ëise tosc da jí inzai cun la ferata? Adorëise debota na cherta da chiló a dailó? Ne orëise nia jí pro n automat a se fá la cherta y a se chirí n automat da la convalidé? Cun la app südtirolmobil ëise sön osc smartphone dagnora la dërta cherta da tó ca.
Chëstes chertes pón cumpré online tl ticketshop:
- Cherta de iade scëmpla regionala: por n iade che i ëis chirí fora o por na trassa combinada cun le bus y la ferata
- Cherta de iade scëmpla urbana: por iadi cun le bus tl raiun dla cité o dl post
- Cherta de n de urbana: por iadi cun le bus tles cités de Balsan/Laives o Maran
- Chertes por la furnadoia y la picia ferata dl Renun y por la furnadoia dla Mendola
- Chertes por le Nightliner
- Mobilcard
- Cherta de viac per n di cun la roda
- Cherta de n de Euregio 2 Plus
I prisc dles chertes online é anfat a chi dles chertes tradizionales, da paié él cun la cherta de credit. Tignide cunt de chësc:
- An pó cumpré na cherta de iade scëmpla regionala ince por na trassa plü lungia combinada olache an mëss plü iadi mudé meso de trasport, p.ej. bus + ferata + furnadoia dl Renun.
- Che che ó s'anuzé di mesi publics convalidëia süa cherta online denanche pié ia diretamënter sö le smartphone; ala ciaferia o al ciafer dl bus o al personal che passa a controlé él da ti mostré le smartphone cun le "iade atif " incornijé a vërt.
- Les chertes online che vel por deplü iadi o ince por deplü dis vëgn en linia de prinzip ma convalidades un n iade y plü avisa le pröm iade denanche pié ia.
- Al é tres ciamó la poscibilité, portada ite bele l'ann passé, da podëi convalidé le Südtirol Pass o le Euregio Family Pass online tres la app südtirolmobil.
Mobile ticketing: informaziuns plü avisa - video
Sistem de ticketing nü: i bus vëgn adatá
Le mobile ticketing vëgn avisa tl dër momënt: N sistem de ticketing nü, l'adoranza de rodunt 400 bus nüs y le progres tecnich á sciöche conseguënza che al scomenciamënt dl 2023 gnarál istalé y metü en funziun te döta la provinzia aparac de convalidaziun nüs. I aparac de convalidaziun bröms che düc conësc á oramai fat so sorvisc. Chisc gnará man man sostituis da automac nüs plü moderns, compatibli cun le mobile ticketing y cun sistems de paiamënt cun la cherta moderns. Mo la maiú desfida sides por le personal tecnich che por les porsones che s'anüza di mesi publics é che le vedl sistem resta inant en funziun, deperpo che al vëgn metü a jí paralelamënter, vare do vare, le sistem de ticketing nü.
Chertes valur: l'import vëgn retü
L'adatamënt tecnich gnará fat tl scomenciamënt dl 2023 por deplü mëisc alalungia y metará naota man ti bus. Por chësta rajun ne funzionará por n certo tëmp nia i aparac de convalidaziun o ai jará ma en pert y ara ne jará nia da d'adoré n valgönes chertes, dantadöt nia les chertes valur. Ares pó gní dades derevers ti infopoints südtirolmubiltà y ti posć de venüda; l'import sön la cherta vëgn retü.
Südtirol Pass: ti bus ne vára nia da ciaré les chertes
Degönes mudaziuns ne n'él por dötes les porsones che á n Südtirol Pass te dötes sües variantes: chëstes chertes pó gní convalidades zënza problems y sciöche dagnora pro i automac nüs denanche pié ia. Te chësta fasa de transiziun ne jarára indere nia plü da ciarié ti bus les chertes prepaiades.