Ciamó chësc ann dessel gní pité n sorvisc de bus che coliëia les provinzies sön la trassa Mals-Landeck: le bus jará 28 iadi al de sura le confin ia.
Do na planificaziun intensiva y tratatives danter la Provinzia autonoma da Balsan y le Land Tirol él sëgn gnü fat fora da mëte sö n coliamënt dl bus diret aslöm danter Mals y Landeck (Tirol). A chësta moda se realisëia ala fin dl ann por tröpes porsones che s’anüza dl bus n dejider.
Coliamënt otimal por pendolars y pendolares
Cina sëgn jôra ma da jí da n comun al ater fajon n iade lunch y sfadius tres Martina (Grijuns) y mudan jö. Sön la trassa da rodunt 75 chilometri danter Mals y Landeck jarál da dezëmber dl 2023 set dis al’edema, danter les 6.40 y les 21.17, 14 iadi n bus ia y ca. Por pité chësc sorvisc che coliëia les provinzies mësson surantó spëises de feter 2 miliuns de euro al ann. Le Land Tirol y la Provinzia autonoma da Balsan cür tramidui avisa le mez dles spëises.
"Le coliamënt sura i confins fora y zënza baraté jö bus da jí a Landeck é da tröc agn n dejider important dla jënt dla Val Venosta che s’anüza dla ferata por jí a lauré o a scora. Cun chësc bus diret vëgn dantadöt ince le coliamënt devers Desproch ciamó plü cört", sotescrí l’assessur provinzial por la mobilité Daniel Alfreider. Contënt é ince le vize-presidënt dl Consëi provinzial Sepp Noggler: "La Val Venosta y l’Oberland dl Tirol se crüzia da agn de n barat intensif, olache al é ince important da avëi de bugn coliamënc di mesi de trasport. Cun le coliamënt diret dl bus nü da Mals a Landeck éra jüda da mioré ciamó deplü chësta oferta.”
Colaboraziun tl’Euregio
"Cun les passa 2600 chertes Euregio2Plus y Euregio-Students venüdes dl 2022 unse bele de beles chertes deboriada tl’Euregio. I adorun ciamó de plü ofertes scëmples da jí sura i confins fora. Dlungia l’ampliamënt dles linies dl bus sura i confins fora mëssel ince gní tut y jü cun i impedimënc legai y tecnics pro la ferata”, dij l’assessur por la mobilité dl Tirol Rene Zumtobel.
Les döes lies dl trasport VVT y südtirolmubiltà laora por che les chertes vëgnes reconesciüdes da tramesdöes les provinzies sön la trassa danter Landeck y Mals. (USP)
Foto: USP / Dejaco