I laurs de costruziun sön la trassa dla ferata Maran – Töll pó indô jí inant y dorará bonamënter 11 mëisc.
De novëmber dl 2021 êl scomencé aladô dl program i laurs d'adatamënt di tuní dla ferata Josefsberg y Töll, sciöche preodü tl cheder dl'eletrificaziun dla linia dla ferata dla Venosta. Bele de dezëmber dl 2021 â la sozieté E.MA.PRI.CE, che ê gnüda inciariada cun i laurs, presenté domanda de prozedöra d'avaliaziun pro la signoria de concurs de Treviso. Da d'aisciöda dl 2022 á spo la signoria bloché i laurs sön la linia dla ferata dla Venosta.
La dita de costruziun FIS, classificada sciöche secunda, vá inant cun i laurs
"Ince sce d'isté unse albü de gran dificolté legales sunse stá bogn da deslié le contrat cun la dita de costruziun E.MA.PRI.CE. Insciö éra jüda da öna na pert da fá lerch a tratatives cun la secunda dita de costruziun F.I.S. de Bergamo che metará man i laurs tles proscimes edemes pro i tuní dla ferata Josefsberg y Töll. Dal'atra pert unse tut ca chësc tëmp por fá analises geotecniches surapró", á dit Joachim Dejaco, le diretur general dla STA - Strotöres dl trasport dl Südtirol SA, che manajëia i laurs por l'eletrificaziun dla ferata dla Venosta.
I laurs pro trami i tuní dla ferata Josefsberg y Töll durará incër 11 mëisc sce an calcolëia che al é ince da mëte jö les scines. "Por la jënt dla Venosta che mëss jí sö y jö é chësc n tëmp da se fá ert y chësc savunse bëgn. Che al vëgn defata indô tut sö i laurs é n vare important por nen gní fora da chësta situaziun complicada y por fá a na moda che la ferata dla Venosta pois tosc indô jí sön döta la trassa. Ala fin é la ferata la sompunta prinzipala por n sistem de trasport publich che funzionëia" se tol a dí l'assessur por la mobilité Daniel Alfreider.
Sorvisc de sostituziun dla ferata
Sorvisc de sostituziun dla ferata Maran – Töll (linia dl bus 250B): L'orar de partënza di bus a Maran (plataforma Z, dlungia le sotpassaje dla ferata) vëgn sposté dant de 10 menüc tratan i orars de trafich prinzipai a na moda da garantí damí le coliamënt cun la ferata dla Venosta tla staziun de Töll ince canche al é n gran trafich sön strada.
Por la jënt che röia indere adalerch da Balsan ó chësc dí che al n'é degun coliamënt diret cun la Val Venosta y insciö él da fá cunt cun tëmps d'aspeta plü lunc.
Prëibel metede averda: i bus de sostituziun dla ferata adora plü o manco dî aladô dla situaziun dl trafich sön strada y insciö pó i tëmps de iade ince ester plü lunc. I coliamënc n'é porchël nia garantis!
Convalidaziun: ti bus de sostituziun dla ferata ne vára no da convalidé no da cumpré chertes. Prëibel convalidé la cherta de iade y i abo bele denanco senté ite tla staziun da Maran o de Töll.
Rodes: ti bus sostitutifs n’él nia poscibl da trasporté rodes. Al vëgn pité n trasport dles rodes separé cina ai 31.10. 2022.