„Passé da n meso de trasport al ater cun sauridanza“ – do chësc moto vëgnel strotoré daldöt danü l’areal dla staziun dla ferata da Bornech. Al vëgn arjigné ca plazes da parché nöies, na staziun dl bus moderna, strades da rové adalerch nöies, tröpes plazes por lascé jö les rodes y n sotpassaje pedonal arlungé por arjunje les scines.
L’areal tol ite passa 22.000 m², che é dl comun de Bornech y dla STA – Südtiroler Transportstrukturen AG. Cun la sotescriziun dl contrat danter la STA y la dita de costruziun inciariada mët man la fasa de costruziun por costruí 230 posć da parché l’auto, sciöche ince na plaza di bus sciöche a Balsan.
La plaza dla staziun a Bornech é le punt zentral dla mobilité te Puster: i dis de scora él feter 3000 porsones che sënta ite chiló tla ferata o tl bus. Chësc é na bona rajun por valorisé le grop de coliamënt, le strotoré sciöche al alda y le renforzé por les ghiranzes de na mobilité flessibla y sostenibla.
La linia dla ferata de Puster á albü ti ultimi agn la majera chersciüda di passajiers de döta la provinzia. Les timbradöres sön chësta linia dla ferata é ti ultimi 10 agn deventades feter trëi iadi tantes y intratan éres de passa 2 miliuns al ann. Cun cina 50.000 timbradöres al mëis o mesanamënter 1700 timbradöres al de é la staziun da Bornech do Balsan, Maran y Porsenú por ci che reverda i numeri di passajiers al cuarto post de döta la provinzia.
La plaza dla staziun é implü tl punt de coliamënt de de plü linies dl bus importantes, pro chëstes toca la linia 450 Aurin, che é la linia de bus regionala dl Südtirol plü anuzada cun feter 1,8 mil. de timbradöres al ann. Porvia di laurs de costruziun é les fermades dl bus dla plaza dla staziun partides sö provisioramënter, les schizes é atira dlungia les fermades.