Straufonghes aministratives
Chi che se cumporta aldò dla regules ne n’à nia drë de se temëi
Uni persona che sënta su n mesun de trasport publich ie respunsabla che i servijes dl trasport publich posse funzioné tl nteres de duc y che i viages posse unì fac tl orden preudù y a na maniera segura. Cie che n muessa se aspité, sce n ne respetea nia la prescrizions, ie udù danora dala lege.
Tla lege provinziela 15 / 2015, art. 50 „Straufonghes di/dla passajires di servijes de trasport publich“ iel scrit dant la despusizions spezifiches sun la straufonghes tl trasport publich tla provinzia. Tlo na sëuraududa:
Danejé o lauré su mesuns de trasport publics, locai, stazions o fermedes, aredamënc o atrezatures: l ie da paië na straufonga danter 100 y 600 Euro restan mpe la despusizions penales dla ndenisazion dl dann.
Desturb o nteruzion dl servisc: Sce na persona limitea sun n mesun de trasport cun si cumpurtamënt la segurëza y l dejëujamënt reguler dl servisc de trasport o la ncolumità di autri passajires possa l persunal sun i mesuns de trasport, aldò de coche l miena, fermé l viac ala maniera ududa danora dala lege y retré la cherta de viac, sce l se trata de na cherta de viac persunela.
Cherta de viac che mancia, che ne vel nia o che ne ie nia cunvalideda: L ie da paië na straufonga aministrativa danter 90 Euro y 180 Euro y l priesc de na cherta de viac scëmpla. Sce n paia debota o tl tëmp de 5 dis da canche n giapa la comunicazion, vëniel aplicà la straufonga minima.
Passajieres che ne à nia na cherta de viac che vel da mustré ca muessa riesc canche l viac scumëncia cuntaté l capoferata. Te chësc cajo iel puscibl, paian n sëurapriesc de 5 Euro, cumpré tla ferata na cherta singula o na cherta per l trasport de n tier o de na roda. Chësc sëurapriesc ne ie nia da paië canche l ne ie pra la stazion de partënza degun automat dala chertes de viac o sce l automat ie da defet.
Adurvanza falëusa de na cherta de viac, p.ej. na cherta de viac fauzificheda o la nuzeda dla cherta de viac persunela da pert de n’autra persona: da paië ie l priesc dla cherta de viac scëmpla y na straufonga aministrativa danter 120 Euro y 800 Euro, restan mpe la despusizions penales, oradechël ti vëniel, a chi che nuza la cherta coche i ne dassëssa nia, debota tëut la cherta. Sce la straufonga vën paieda debota o tl tëmp de 5 dis da canche n giapa la comunicazion, vëniel aplicà la straufonga minima.
Regulamentazion speziela per l Südtirol Pass abo+, l Südtirol Pass 65+ y l Südtirol Pass free coche nce l Pass de scola
Nia tëut pea la cherta de viac: Spëises aministratives da 15 Euro, sce l vën desmustrà tl tëmp de 5 dis pra l servisc de trasport curespundënt che n à la cherta de viac, sce no iel da paië na straufonga aministrativa de 180 Euro.
Cherta de viac nia cunvalideda: Spëises aministratives de 15 Euro, sce la straufonga vën paieda mo sun l mesun de trasport o tl tëmp de 5 dis, sce no cumporta la straufonga aministrativa 60 Euro.
Nia tëut pea la cherta d’identità (vel per jëunes y jëuni da 14 ani insù): Spëises aministratives de 15 Euro, sce la identità dl pussessëur dl abunamënt vën verificheda tl tëmp de 5 dis, sce no iel da paië na straufonga aministrativa de 60 Euro.
D’autra nfurmazions
Sce la straufonga ne vën nia paieda aldò dla prescrizions, vën l protocol d’identificazion mandà inant al reprejentant legal dla mpreja de trasport curespundënta, acioche l debe ora l avis de paiamënt dla straufonga.
L’autëza dla straufonghes de scioldi possa unì adateda uni ann da pert dla Jonta provinziela ai custimënc dl mantenimënt dla vita aldò dl indesc ASTAT.
D’autra mesures che vën aplichedes tla mubiltà publica se stiza nce sun chësta fundamëntes de lege:
- lege provinziela di 3 de lugio 2006 n. 6 per la prutezion dla sanità de chi che ne fuma nia;
- Titul II dl decret dl Presidënt dla Republica di 11 de lugio 1980, n. 753, n forza; sce la despusizions ne vën nia respetedes vëniel aplicà la straufonga aministrativa preududa, avaneda dl 300 percënt sce la cossa ne ie nia reguleda aposta tl articul 50 dla LP 15 / 2015.