L'app südtirolmobil é cina incö gnüda istalada sön incër 200.000 smartphones. Cun le mobile ticketing y les funzionalités nöies vëgnera adorada tres deplü.
Che al ne sides nia assá anuzadësses y anuzadus ne pó südtirolmobil veramënter nia se baudié: al vëgn ciaré do i orars mesanamënter 60.000 iadi al de, la maiú pert tres l'app. Te dis olache tröpa jënt vá incërch, sciöche da Pasca dl 2023, n'él gnü registré 80.000 al de. Nüsc tecnics laora tresfora por mioré l'app - ince por mirit de tröpes propostes da osta pert - y por garantí n'adoranza plü comota cun funzionalités nöies. Chiló les ultimes novités:
Partí le coliamënt
I ëis chirí fora tres la chirida dl coliamënt osc iade cun le bus o la ferata y i oresses atira ti le lascé alsavëi a zacai d'atri? Bëgn, spo clichede dlungia le coliamënt chirí fora sön i trëi punc söinsom a man ciampa. Cun "Partí le coliamënt" ti menëise diretamënter inant dötes les informaziuns cun lapró i orars y la descriziun dl iade ala porsona che i orëis: tres e-mail, WhatsApp o tres tröc d'atri canai che é a osta desposiziun.
Fissé i favoric: architades o coliamënc
Sëise plü gonot por incërch sön la medema trassa o ves anuzëise plü iadi dles medemes architades? Spo bastel da sëgn inant ma plü n clich por chirí üsc orars: sëgn podëise fissé certes trasses o osta posiziun da pié ia sciöche favoric. Insciö canche i chiris i orars online ne ëise nia plü bria da dé ite vigni iade danü le coliamënt o l'architada.
Filtré les comunicaziuns
Pro plü co 200 linies dl bus, 4 linies dla ferata, 5000 architades, pro stlütes por manutenziun, deviaziuns o scioperi - sozedel datrai che al röia adöm tröpes comunicaziuns. Por chirí te na manira plü mirada y avëi debota na vijiun generala pitunse la poscibilité da filtré les comunicaziuns: do temesc, do le tëmp che an ó o do la priorité.
Rodé cun plü flessibilité
Che che á intenziun da fá n iade cun le bus o la ferata pó se fá atira so ticket online cun le smartphone. Anfat sce ara se trata de na cherta de iade scëmpla, na cherta por n de o la Mobilcard - cun le mobile ticketing ne adorëise no na cherta no automac de convalidaziun. Por dötes les porsones che n'á nia le Südtirol Pass o n abonamënt é chësta dessigü la poscibilité plü comota por rodé incërch te döta la provinzia cun i mesi dl trasport publich y la dërta cherta de iade.