La prezedënza ala mobilité publica: en lönesc, ai 22 de novëmber vëgnel metü a jí definitivamënter i semafri sön la trassa dl metrobus tl Überetsch.
Do la fasa de proa tecnica éra sëgn tan inant: cun la metüda a jí di implanc de semafri a Kaltern y Eppan vëgnel sëgn realisé n ater elemënt zentral dl proiet dl metrobus. "Ala mobilité publica ti vëgnel sëgn dé na prezedënza ampla ti confrunc dl trafich individual" alza fora l'assessur por la mobilité Daniel Alfreider. Por dötes les porsones che tol le bus ó chësc dí che le tëmp de iade s'ascortëia de cotan, dantadöt tratan i orars de trafich prinzipai, y garantësc plü comodité de iade. "Adöm cun na gran oferta de coliamënc dl bus, l'organisaziun nöia di posć da lascé jö l'auto por pendolars y pendolares a Kaltern, les lercs d'architada y les striares por i bus é chisc de bogn argomënc y ciamó n majer stimul por lascé l'auto privat te garage y passé ala mobilité publica" dij Alfreider.
Pro indöt cin' architades él gnü metü sö i semafri nüs: Eppan incrujada St. Pauls, staziun de Eppan, Untere Gand, Unterplanitzing y staziun de Kaltern. I semafri garantësc che i bus pó cun le vërt indô pié ia diretamënter y zënza perde tëmp dales lercs d'architada, deperpo che le trafich di auti vëgn tigní sö. Implü ti vëgnel insciö ince garantí na majera segurëza ales porsones che vá ite y vëgn fora de bus.
L'assessur Alfreider fej ciamó n iade n apel a dötes les porsones da mëte averda y se comporté te na manira responsabla canche ares é sön strada. "Cun la metüda a jí di semafri tl Überetsch mëtel sëgn man na fasa nöia a bëgn dla mobilité publica cun l'obietif concret da limité le trafich tl raiun d'aglomeraziun Balsan-Überetsch" dij Alfreider. Le proiet dl metrobus é sön le dër tru da gní n model che podess avëi suzes ince altró.