Vel’ stazions vën śën tla ferates nce cunedides per ladin: Burnech Nord, Burnech, San Laurënz, Tluses y Pruca. Y tla valedes ladines saral tosc nce da garat tla corieres cunedides te trëi rujenedes.
Canche n ruva tla stazions de Burnech Nord, Burnech, San Laurënz, Tluses y Pruca auden tla ferata ultimamënter la cunedides dla fermedes, ora che per tudësch y per talian, nce per ladin, plu avisa ti idioms badiot y gherdëina. Tl’enes y ti mënsc che vën saral pona, man man che l unirà tëut n droa la corieres nueves, da garat tla corieres te Gherdëina, tla Val Badia y te Fascia nce la verscion ladina dla cunedides dla fermedes.
“A chësta maniera ulons dé n sëni sterch dl’adurvanza dl ladin y purté pro nsci al fat che l lingaz plu vedl de nosta provinzia, sibe te si idiom de Gherdëina che te chël dla Val Badia, vënie mantenì y curà inant“, sotrissea l assessëur per la Mubiltà Daniel Alfreider. Oradechël ie chësc nce n sëni dl aprijamënt y dla revalutazion di inuemes ladins di luesc.
Danter l auter: la usc ladina ie chëla de Maria Craffonara de Burnech, che vën da na familia dla Val Badia. La registrazions per la plu o manco 355 fermedes ie unides fates n culaburazion cun l servisc Südtirolmubiltà y l Zënter de nfurmazion dla STA.