Pudëi se nuzé debant di mesuns de trasport publics
Mutons y mutans, persones cundejabiltà y persones tl servisc soziel
Mutons y mutans sota 6 ani coche nce mutons y mutans che sta tl Südtirol che à plu che 6 ani ma che ne va mo nia a scola furnea debant y ne muessa nia avëi na cherta de viac; i/les possa mé furné cun n mesun de trasport publich sce i ie acumpaniei da na persona sëura 18 ani.
Persones residëntes tl Südtirol cun na invalidità zevila dal 74 % insù, persones sëurdes che ie residëntes tl Südtirol o persones residëntes tl Südtirol cun n’autra invalidità, che ie ecuipareda aldò dla despusizions dla Jonta provinziela al degré de invalidità zevila de 100 %, coche nce persones residëntes tl Südtirol che ne ie per si invalidità fisica permanënta nia bones de fé la cunvalidazion, à la rejon de se nuzé debant di mesuns de trasport publics. La cherta de viac Südtirol Pass free vën data ora sun dumanda dal ufize provinziel per l Trasport de persones.
Persones vierces o cun na dejabiltà de udëi possa n generel se nuzé debant y zënza limitazions di mesuns de trasport publics mustran ca l documënt curespundënt.
Sculées y sculeies dla scoles de ublianza, che tol pert a programs de barat culturel o a scumenciadives umaniteres cun d’autra scoles o istituzions tl Südtirol, possa se nuzé debant di mesuns de trasport publics ntan si permanënza. L ufize provinziel per l Trasport de persones dà ora n’autorisazion curespundënta.
Persones che fej l servisc zevil y soziel aldò dla lege provinziela di 19.11.2012, n. 19, coche nce persones che fej l servisc zevil statel aldò dla lege 64/2001, possa sce les mostra ca l pass dl servisc zevil o soziel nuzé debant i mesuns de trasport publics.
Jëuni y jëunes che fej tl Südtirol l ann soziel ulenter o l servisc europeich ulenter possa se nuzé debant di mesuns de trasport publics ntan l servisc ulenter.
La forzes dl orden possa se nuzé debant di mesuns dl trasport publich tl cheder de si servisc, nce tl furnimënt zevil, a cundizion che les se prejënta se identifican dant pra l personal dl mesun de trasport.
Cumëmbri dla forzes armedes possa ntan si servisc y cun la uniforma se nuzé debant di mesuns de trasport publics.
La forzes dl orden y cumëmbri dla forzes armedes: i mesuns dl trasport dla südtirolmubiltà per chëi che la Provinzia de Bulsan à l pudëi de dezijion sun la tarifes possa unì nuzei zënza cherta de viac. Pra chisc mesums tochel la ferates regiuneles “R” dal Prëner a Trënt y da Mals a Sanciana/Vierschach, la curieres te zità, chëles regiuneles y i Citybus, la furnadoia dl Renon, la ferata a scines strëntes dl Renon y la furnadoia a cremaliera sun al Mendula. Stlutes ora ie la ferates regiuneles express “RV”, la ferates a destanza longia (EC, IC, Italo, Frecce, y nsci inant) coche nce la furnadoies ntegredes tl sistem tarifer dla südtirolmubiltà a Meransen, Mölten, Vöran y Kohlern.
Avis: Chësta despusizions per l trasport debant ne vel nia per viages cun la curieres Nightliner.