Südtirol Pass 65+
Pudëi se muever ne ie nia na cuestion d’età
L Südtirol Pass 65+ ie na cherta de viac persunela, eletronica y anuela per persones sëura i 65 ani. A n priesc fis da paië n iede al ann possel unì adurvà flessibilmënter y zënza limitazions te dut l raion dl trasport südtirolmubiltà cun leprò nce la ferates regiuneles nchin a Trënt.
Nia unì adurvà ne possa l Südtirol Pass 65+ sun la trassa dal Prëner a Dispruch y da Sanciana / Vierschach a Lienz, sce n uel tò pea rodes o tieres y ënghe nia sun la curieres Nightliner y la ferates a destanza longia.
L Südtirol Pass 65+ ie da cunvalidé dan uni viac cun n check-in scëmpl. Sun dumanda dl personal de cuntrol sun la ferates y la curieres iel nce da mustré ca la cherta d’identità.
Per l Südtirol Pass 65+ iel mé da paië na soma pausciala al ann:
- 150 Euro: per persones danter 65 y 69 ani
- 75 Euro: per persones danter 70 y 74 ani
- 20 Euro: per persones da 75 ani insù
La soma fissa al ann possa unì paieda pra la lueges de venduda südtirolmubiltà. L slungiamënt anuel possa nce unì fat online cun cherta de credit / pagoPA (l possa unì a se l dé spëises) sun chësta plata web.
Persones da 65 ani insù, che ie residëntes tl Südtirol, possa damandé l Südtirol Pass 65+ scrijan ora n formuler pra la lueges de venduda südtirolmubiltà. Iló posseles nce jì a se tò y paië l Südtirol Pass 65+.
Nce persones dla provinzia de Bulsan sëura i 65 ani che viv oradecà, che à la zitadinanza taliana y che ie scrites ite tl register A.I.R.E. de n chemun dla provinzia possa se damandé l Südtirol Pass 65+: suedtirolpass@suedtirolmobil.info
Dala data che l ie unì dà ora vel l Südtirol Pass 65+ n ann alalongia.
L slungiamënt possa unì fat diretamënter pra la lueges de venduda südtirolmubiltà sce n prejentea la cherta y paia l priesc anuel. Chësc ie bele puscibl n mëns dan che la cherta destoma o nce mo tl tëmp de n ann do che la cherta ne valova nia plu; te chësc ultimo cajo durel almanco 24 ëura nchin che la cherta de viac possa inò unì adurveda.
L priesc anuel possa nce unì paià online tres cherta de credit / pagoPA (l possa unì a se l dé spëises) o tres Internet Banking (pra banches autorisedes - slungiamënt y paià).
Uni viac cun la curiera o la ferata muessa unì registrà cun n check-in scëmpl pra i njins de cunvalidazion brums, sce no ne vel la cherta de viac nia. Per fé la cunvalidazion tlechel tenì la cherta Südtirol Pass 65+ permez al sensor.
Canche n furnea cun la ferata: sce n muda ferata nen tulan n’autra de cunliamënt ne iel nia de bujën de fé mo n iede na cunvalidazion tla stazion ulache n muda. Chiche furnea cun l Südtirol Pass 65+ cun na ferata regiunela dal sud de Trënt de viers de Bulsan y che à na cherta de viac valeivla per la trassa nchin a Trënt ne muessa nia cunvalidé si abunamënt per furné inant de viers dl Südtirol.
Trasses dla ferata Dispruch-Prëner y Lienz-Sanciana: Bele tla stazions de Dispruch, Sillian y Lienz iel puscibl fé la cunvalidazion cun validità dala stazion dl Prëner o dala stazion de Sanciana. Per la trassa austriaca muessen fé na cherta aposta.
Sun dumanda possen for njunté al Südtirol Pass 65+ na funzion de paiamënt per servijes sëuraprò sibe coche cherta-prepaid da ciarië, sibe coche cherta postpaid cun detrazion direta dal contcurënt bancher (SEPA Direct Debit). Nsci possen paië:
- na tarifa al di per tò pea la roda
- l priesc de viac per tò pea n tier
- viages cun l Nightliner (ala tarifa Nightliner)
- viages cun ferates regiuneles Prëner-Dispruch y Sanciana-Lienz. Te chësc cajo vëniel ratà sun la trassa austriaca la tarifa dla VVT / ÖBB; chi che à na cherta vantaje dla ÖBB possa la registré sun si cont de nuzeda online y se nuzé nsci dla tarifa de vantaje.
Cunvalidé: Per l Südtirol Pass 65+ cun funzion de paiamënt ativeda velel pra la cunvalidazion la medema cundizions de nuzeda sciche dal Südtirol Pass normal. Dantaldut sce n furnea cun la ferates regiuneles iel de mpurtanza, canche n fej la cunvalidazion, dé ite l numer de codesc dla stazion de destinazion y l cunfermé. Sce no ne vel la cunvalidazion y la cherta nia.
Sce n se pierd la cherta dl Südtirol Pass 65+, sce la vën rubeda o sce n vëij che la ie danejeda possen se damandé n duplicat per l priesc de 20 Euro, y chël:
- pra la purteles y lueges de venduda südtirolmobil;
- online tres l cont de nuzeda persunel sce i servijes de njonta (funzion de paiamënt) ie unic ativei y l ie unì crià n cont de nuzeda;
Metëde verda: La dumanda ne possa nia unì desdita.
Sce n ne vëij pra l Südtirol Pass degun dann ma la cherta ne funzionea nia pervia de n defet o n deslisamënt dl material possen se damandé pra la lueges de venduda de chertes südtirolmobil na copia dla cherta. Chësta ie debant.